மஸ்ஜித்களும் பொதுச் சொத்துக்களும்.

Posted by Lanka Scholars on Tuesday, April 5, 2016 | 0 comments



நமது இலங்கை நாட்டைப் பொறுத்தவரை முஸ்லிம்களுக்குரிய பொதுச் சொத்துக்கள் என்பது அநேகமாக மஸ்ஜித்களுடன் இணைந்ததாகவே காணப்படுகிறது. எனவே அவற்றை பராமரிக்க வேண்டிய மற்றும் பாதுகாக்க வேண்டிய தற்காலிகமான பொறுப்புதாரிகளாக மஸ்ஜித்களின் நிருவாகிகளும், அதன் நிரந்தர பொறுப்புதாரிகளாக இலங்கையின் வக்ப் சபையும் இருக்கிறது. 



இலங்கையிலுள்ள மஸ்ஜித்களை நாம் இரண்டு வகையாகப் பிரிக்கலாம். 

1. பொதுச் சொத்துக்கள் இல்லாத வருமானம் குறைந்த மஸ்ஜித்கள்
2. பொதுச் சொத்துக்கள் உள்ள வருமானம் நிறைந்த மஸ்ஜித்கள்

முதல்வகை மஸ்ஜித்கள் அல்லாஹ்வின் கிருபையால் ஓரளவுக்கு திருப்திகரமாகவே இயங்கி வருகின்றன.
இரண்டாவது வகை மஸ்ஜித்கள்தான் இன்று கவலைக்கிடமான நிலையில் இயங்கிக் கொண்டிக்கிறன. இம்மஸ்ஜித்களில் நிருவாகசபைத் தெரிவுகூட முறையாக நடத்த முடிவதில்லை.

நிருவாகிகளாக இருப்பவர்கள் தங்கள் பதவிக்காலம் முடிந்த பிறகும் பதவியை விட்டுக் கொடுக்காமை, வருடக்கணக்காக திட்டமிட்டு நிருவாக சபைக்குள் நுழைந்து கொள்ள முயற்சி செய்தல், (இதற்கு உறுதுணையாகவோ என்னவோ சமீப காலமாக வக்ப் சபை முன் வைக்கும் நிருவாகத்தெரிவு முறை. அதாவது: நிருவாகிகளாக வர விருப்பமான குழுக்களிடமிருந்து விண்ணப்பங்களை கோருதல். இந்த முறையை இவர்கள் எந்த மார்கத்திலிருந்து கற்றுக்கொண்டார்கள் என்பது தெரியவில்லை.) நிருவாகிகளாக வருவதற்காக முஸ்லிம் அல்லாத அரச அதிகாரிகாரிகளின் பரிந்துரைகளை முற்படுத்துதல், அரசியல்வாதிகள் நிருவாக சபைக்குள் நுழைந்து கொள்ள எத்தனித்தல், நிருவாகத் தெரிவின்போது அடிதடிகளும் சண்டை சச்சரவுகளும், இந்த தடைகளையெல்லாம் தாண்டி ஒரு நல்ல நிருவாகசபை தெரிவு செய்யப்பட்டு விட்டுவிட்டால் அவர்களுக்கெதிராக பழைய நிருவாகிகள் நீதிமன்றங்களில் வழக்குத் தொடருதல்.

இப்படி இன்னும் ஏராளமான பிரச்சினைகளை அடுக்கிக்கொண்டே போகலாம். இதன் அடிப்படைக் காரணம் என்ன என்பதை நாம் சற்று நிதானமாக சிந்தித்தால் மூன்று காரணங்களை நாம் குறிப்பிட்டுச் சொல்ல முடியும்.

1. இறைச்சமும் மார்க்க அறிவும் இல்லாமை.
2. பதவி மோகம்.
3. குறுக்கு வழியில் பணம் சம்பாதிக்கும் கீழ்த்தரமான ஆசை.

இறைச்சமும் மார்க்க அறிவும் நிருவாகளுக்கும் இருக்கவேண்டும், அவர்களைத் தெரிவு செய்பவர்களுக்கும் இருக்கவேண்டும் என்பதை இஸ்லாம் வலியுறுத்துகிறது.

மஸ்ஜித்களின் நிருவாகிகள் “அல்லாஹ் அல்லாதவர்களைப் பயப்படுபவர்களாக இருக்கக்கூடாது” என்று அல்குர்ஆன் (9:18) வது வசனத்தில் கூறுகிறது. இந்த வசனத்தை பலர் தவறாகவே புரிந்து கொள்கிறார்கள். சண்டித்தனம் காட்டக்கூடியவர்கள் என்று நினைத்துக் கொண்டு அப்படியானவர்களை முற்படுத்த முயற்சிக்கிறார்கள். 

இந்த வசனத்தில் அல்லாஹ் இறையச்சத்தையே வலியுறுத்துகிறான். சண்டித்தனமுள்ளவர்களால் ஒரு குறுகிய காலத்துக்குள் குறுகிய வட்டத்திற்குள் மட்டுமே சாதிக்க முடியும். இறைச்சமுள்ளவர்கள் எல்லாக்காலத்திலும் எல்லா இடத்திலும் சாதிப்பார்கள், அவர்களுக்கு அல்லாஹ்வுடைய உதவியும் இருக்கிறது என்பதை பலர் புரிந்துகொள்வதே இல்லை.

நிருவாகங்களில் நடைபெறும் முறைகேடுகளுக்கும் பொதுச் சொத்துக்களை விழுங்கி ஏப்பமிடும் அதிகார வர்க்கத்தினரின் தவறுகளுக்கும் முழுமையாக அல்லாஹ்விடம் பதில் சொல்லவேண்டியவர்கள் வக்ப் சபையைச் சார்ந்தவர்களே என்பதை அவர்கள் மறந்து விட்டார்களோ என்னவோ தெரியவில்லை.

இலங்கையின் பல பாகங்களிலிருந்தும் சமீபகாலமாக பொதுமக்கள் தெரிவிக்கும் கருத்துகளை வைத்துப் பார்க்கும்போது தகுதியற்றவர்களை பதவி அமர்த்தவும் மஸ்ஜித்களில் நிருவாகிகள் என்ற பெயரில் சில அரசியல்வாதிகளின் உதவியோடு அடாவடித்தனம் செய்வபவர்களுக்கு உதவவும்தான் வக்ப் சபை இருக்கிறதோ என எண்ணத்தோன்றுகிறது.

இப்படியாக தகுதியற்ற நிருவாகிகளிடத்தில் மஸ்ஜித்களும் பொதுச் சொத்துக்களும் ஒப்படைக்கப்படும்போது அவர்கள் அப்பொருட்களை அல்லாஹ் அவர்களுக்குக் கொடுத்த பாக்கியமாகவும் தமது சொந்தச் சொத்துக்களைப்போன்றுமே நினைக்கிறார்கள். சில சமயம் மஸ்ஜித்களுக்குச் சொந்தமான காணிகளையும் கடைகளையும் விற்றுவிடுகிறார்கள். சிலசமயம் தமதாக்கிக் கொள்கிறார்கள். சில சமயம் வாடகைக்குக் கொடுத்துவிட்டு வாடகையில் ஒரு பகுதியை மஸ்ஜிதுக்குக் கொடுக்கிறார்கள் இன்னொரு பகுதியை தாங்கள் சாப்பிட்டு விடுகிறார்கள்.

பொதுச் சொத்துக்களில் கையாடல் செய்பவர்களைப் பற்றி அல்லாஹ் என்ன சொல்லி இருக்கிறான் என்பதை அவர்கள் தெரிந்து கொள்ள முயற்சிப்பதும் இல்லை. அவர்களோடு விசுவாசமாக நடந்துகொள்ளும் சில ஆலிம்களும் தங்களுக்குக் கிடைக்கும் சலுகைகள் இல்லாமல் போய்விடும் என்பதற்காகவோ என்னவோ அவற்றை எடுத்துக்கூற எத்தனிப்பதும் இல்லை.

அல்லாஹ் கூறுகிறான்: அபகரித்தவர் தான் அபகரித்த பொருட்களுடனேயே மறுமையில் வந்து நிற்பார்' அல்குர்ஆன் (3:162)

நபி (ஸல்) அவர்கள் கூறினார்கள்: ''உங்களில் ஒருவரை நாம் ஒரு பொறுப்புக்காக நியமித்து அவர் எம்மிடம் காட்டாமல் ஒரு தையல் ஊசியை அல்லது அதனை விட அற்பமான ஒரு பொருளை மறைத்தாலும் அது மோசடியாகும். அதனை எடுத்துக் கொண்டு மறுமைநாளில் அவர் வருவார். (ஆதாரம்: முஸ்லிம்)

இப்னு அப்பாஸ் (ரழி), தனக்கு உமர் (ரழி) அவர்கள் தெரிவித்ததாகப் பின்வரும் சம்பவத்தை அறிவிக்கின்றார்கள்: கைபர் யுத்தம் நடந்து முடிந்த பின்னர் நபி (ஸல்) அவர்களது தோழர்களிற் சிலர் அங்கு வந்தனர். மேற்படி யுத்தத்தில் கொல்லப்பட்டவர்களைப் பற்றி 'அவர் ஷஹீத், இவர் ஷஹீத்', என்றெல்லாம் பேசிக் கொண்டார்கள். ஒரு நபரை (அவரது ஜனாஸாவைக் கடந்து சென்ற அவர்கள் 'இவரும் ஷஹீத்' என்றனர். அதுகேட்ட நபி (ஸல்) அவர்கள் ''நீங்கள் அப்படிக் கூற வேண்டாம். அவர் யுத்தத்தில் கிடைத்த கனீமத் பொருட்களில் ஒன்றான ஓர் ஆடையை அல்லது மேலங்கியைத் (திருட்டுத் தனமாக) அபகரித்துக் கொண்டார். அந்த ஆடையுடன் அவரை நான் நரகில் கண்டேன்'' என்று கூறி விட்டு,  ''உமர் இப்னு கத்தாபே! நீர் சென்று முஃமீன்களைத் தவிர வேறு எவரும் சுவர்க்கம் நுழைய மாட்டார்கள்'' என்று மக்களுக்கு மத்தியில் சொல்வீராக'' என்றார்கள் (ஆதாரம் : முஸ்லிம்)

யுத்தத்தின் போது எதிரிகளிடமிருந்து கைப்பற்றப்பட்ட (கனீமத்) பொருட்களிலிருந்து ஓர் ஆடையைத் திருட்டுத்தனமாக அபகரித்துக் கொண்ட நபருக்கு நேர்ந்த கதி இந்த ஹதீஸில் சித்தரிக்கப்படுகிறது. பொதுச் சொத்துக்களை அபகரிப்போர், அவற்றில் கையாடல் செய்வோர், அதிகாரத்தைப் பயன்படுத்தி தம் சொந்த நலன்களை ஈட்டிக் கொள்வோர் போன்றோருக்கு இந்த ஹதீஸில் மிகுந்த எச்சரிக்கை விடுக்கப்படுவதைக் காணலாம்.

கைபரின் போது இறந்த இன்னுமொரு நபருடைய ஜனாஸாவுக்கான தொழுகையை நடாத்தி வைப்பதற்கு நபியவர்கள் மறுத்தார்கள். அப்போது அங்கிருந்தோர் அவர் “அல்லாஹ்வின் பாதையில் போராடிக் கொண்டே யுத்தப் பொருளைத் திருடியிருக்கின்றார்'' என்று நபியவர்கள் கூறியதாகவும் அவரது பொட்டலங்களை ஸஹாபாக்கள் ஆராய்ந்து பார்த்த போது இரண்டு திர்ஹம்கள் கூட பெறுமதியற்ற யூதர்களது ஆபரணமொன்று அங்கு கண்டெடுக்கப்பட்டதாகவும் தெரிவிக்கப்படுகிறது. (ஆதாரம் : அஹ்மத் : அபூதாவூத்)
இங்கும் கூட இரண்டு திர்ஹம்கள் திருடப்பட்டமைக்காக அவர் மீது தொழுகை நடாத்த நபியவர்கள் மறுத்தமை பொதுச்சொத்தில் - அது சிறியதாயினும் பெரியதாயினும் எவரும் ஆசைவைக்கலாகாது என்பதை உணர்த்துவதற்காகும்.

பொதுச் சொத்துக்களை எவ்வளவு அவதானத்துடனும் எச்சரிக்கையோடும் கையாள வேண்டும் என்பதனை உணர்த்த மேலுள்ள ஹதீஸ்கள் போதுமானவையாகும்.
எனவே அல்லாஹ்வின் சந்நிதியில் பதில் சொல்ல வேண்டும் என்ற அச்சத்தோடு சிறிய பெரிய அனைத்துப் பொறுப்புக்களையும் சொத்துக்களையும் கையாள்வது அவசியமாகும்.

அத்துடன் முஸ்லிம்களின் பொதுச் சொத்துக்களிலும் மஸ்ஜித்களின் நிருவாகத்திலும் மோசடி நடைபெறும் போது அவற்றை கடிதங்கள் மூலம் வக்ப் சபைக்கு தெரிவிக்க வேண்டிய பொறுப்பு ஊர்மக்களுக்கு இருக்கிறது என்பதையும் பொதுமக்கள் புரிந்து கொள்ளவேண்டும். நிருவாகக் காலம் காலம் முடிந்த பிறகும் பலவந்தமாக நிருவாகத்தை பிடித்துக் கொண்டிருப்பவர்கள் பற்றியும் கடிதங்கங் மூலம் வக்ப் சபைக்குத் தெரிவிக்க வேண்டும்.

அப்படி அனுப்பப்படும் கடிதங்களின் நகல்களில் ஒன்று அகில இலங்கை ஜம்இய்யதுல் உலமாவுக்கும் மற்றொன்று தேவைப்பட்டால் நீதியமைச்சருக்கும் அனுப்பி வைக்கப்பட வேண்டும். இம்முறைகளை கையாண்டால் இன்ஷா அல்லாஹ் எமது பொதுச் சொத்துக்களும் மஸ்ஜித்களும் பாதுகாக்கப்பட ஏதுவாக அமையும்.

அஷ்ஷேய்ஹ் இர்ஷாத் முஃமின்

0 comments for "மஸ்ஜித்களும் பொதுச் சொத்துக்களும்."

Leave a reply

Popular Posts